Sètz aicí : Acuèlh > Nòstras missions > Ensenhar l’occitan > Departament pedagogic > 1èra session oficiala del DCL occitan

1èra session oficiala del DCL occitan

LO DCL (diplòme de competéncia en Lenga) es un diplòme d’Estat desliurat pel ministèri francés de l’ensenhament. Dempuèi gaire, existís un DCL occitan e la primièra session oficiala se farà lo dissabte 21 de mai dins las acadèmias de Tolosa, Montpelhièr e Bordèu. Aquel diplòme es dubèrt a totes quines que sián lo nivèl d’estudi e la competéncia de basa. A per tòca d’avalorar las competéncias d’utilizacion e de produccion de l’occitan dins un quadre professional. Las inscripcions son dubèrtas tre ara e fins al 27 de març 2011 sul site www.d-c-l.net.

1èra session oficiala del DCL occitan

En tant qu’organizacion màger de corses als adultes, L’Institut d’Estudis Occitans a portat sa contribucion dins l’elaboracion d’aquel diplòma. Serà l’escasença de far certificar un vertadièr nivèl de lenga d’un biais interactiu. Totas las competéncias comunicativas son presas en compte : escota, produccion orala, prene part a una convèrsa, legir, comprene e argumentar. Serà doncas per cada aprenent que seguís un cors per adulte o per un ensenhaire un biais oficial de certificar los aquesits.

Cossí se debana lo DCL ?

L’examen se passa amb una espròva d’una durada de 2 oras 30, presentada jos la forma d’un jòc de ròtle : lo candidat es cargat d’una mission ont li caldrà far una causida e la justificar. Lo candidat legís, escota, s’entreten amb un interlocutor, tracta l’informacion e escriu un document de sintèsi. L’espròva caup cinc fasas : Presa d’informacions dins de documents escrits, presa d’informacions dins de documents sonòrs, entreten telefonic (presentacion orala a un interlocutor e entreten complementari), redaccion d’un document per explicar e argumentar sa causida. Aprèp l’espròva, una jurada atèsta lo nivèl obtengut pel candidat. 5 grases son possibles, en referéncia al CECRL (Cadre Europèu Comun de Referéncia per las Lengas) : nivèl A2 / nivèl B1 / nivèl B1+/ nivèl B2 / nivèl C1.

S’inscriure :

Per la session 2011 del dissabte 21 de mai, l’inscripcion se fa en linha sul site www.d-c-l.net e fins al 27 de març 2011. Los fraisses d’inscripcion son de 100€.

Lire la page en français