Sètz aicí : Acuèlh > Actualitat > Arquius > Compte rendut : L’occitan, convidat al Salon del tourisme Mahana (Tolosa, 3-5 febrièr)

Compte rendut : L’occitan, convidat al Salon del tourisme Mahana (Tolosa, 3-5 febrièr)

Lo divendres 3 de febrièr, lo Conselh general del Tarn, en partenariat amb lo Conselh regional de Miègjorn Pirenèus, convidava totes Miègjorn Pirenencs al Salon del Torisme Mahana per une animacion sul platèu de TV CT2E.

Compte rendut : L’occitan, convidat al Salon del tourisme Mahana (Tolosa, 3-5 febrièr)

S’agissiá de metre endavant una iniciativa mai que mai tarnesa, lo torisme cultural occitan : "Viatjatz al còr d’un territòri que conten dins son istòria e sa cultura une vertadièra mina d’òc ! Lo departament del Tarn presentarà las accions novatrices qu’empenha per dire d’enriquir l’ofèrta toristica en valorant lo patrimòni occitan" anonciava lo comunicat del Conselh general del Tarn. E de fait, s’apujant sus l’enquista lingüistica recenta en Miègjorn Pirenèus, e mai particularament las chifras obtengudas pel Tarn, En Philippe Sour, representant lo Conselh general del Tarn, e En Guilhèm Latrubesse, conselhièr regional de Miègjorn Pirenèus encargat dels afars occitans, metèron endavant l’interés exprimit dins la region Miègjorn Pirenèus per la lenga e la cultura occitanas coms un atot toristic, doncas economic, de desvolopament e de creissença.

Directritz del Comitat Departemental del Torisme (CDT) del Tarn, Na Patricia Briquet anonciava las primièras iniciativas presa en compte de la lenga occitana dins los procediments de la CDT amb de visitas guidadas. Una presentacion eficaça d’aquela iniciativa, conclusa per una degustacion de produits tarneses labelizats « Òc per l’occitan » (produits de la fromatgeriá Marty e vin de Galhac d’En Gilles Litre), qu’En Laurenç Gòsset, director de l’Institut d’Estudis Occitans (IEO), e En Bòris Daussat, animator del labèl « Òc per l’occitan », aprecièron partetjar amb los intervenants e lo public. Èra l’escasença de remembrar que la còla encargada de la promocion del labèl sus l’ensem de l’espaci occitan desira veire se desvolopar d’iniciativas identicas enlai los limites regionals, quitament se Miègjorn Pirenèus demòra pel moment mai engatjat, amb sas accions pilòts. Aquò serà l’enjòc del labèl en 2012 : de far conéisser e d’iniciar de novèlas iniciativas per reconéisser e far conéisser l’engatjament dels labelizats, e lors produits e servicis, a una populacion locala, regionala, interregionala, emai estrangièra, dins los meses que venon.

Alara, labelizats, clients e curioses, esitatz pas a nos far conéisser vòstras accions o las accions en benefici de la lenga occitana que descobriretz, car es sus elas que la còla « Òc per l’occitan » poirà bastir sas accions futuras.

 

Lire la page en français
Portfòlio de l'article