Sètz aicí : Acuèlh > Conéisser l’IEO > Vejaire > E ara, cèrcan garrolha a la premsa occitana !

E ara, cèrcan garrolha a la premsa occitana !

Après la senhalizacion bilingüa, l’ensenhament, vaquí vengut lo torn de la premsa. Lo jornau La Setmana vèn de recebre una notificacion de la CPPAP, (Co-mission Paritària de la Premsa e deis Agéncias de Premsa) que s’opausa au versa-ment deis ajudas publicas parier coma ai mèdias francofòns.

E ara, cèrcan garrolha a la premsa occitana !

Cu pòt encara empassar lo braguetinada oficiau que voudriá faire acrèire que la modificacion de la Constitucion (julhet de 2008) creèsse "un contèxte novèu per lei lengas regionalas. L’Estat regarda, que dison, que ren entravèrse la libertat d’expression" ?

Cu sofra encara la parladissa grotèsca que rebeca que lo "quadre legislatiu actuau ne’n permet una preséncia refortida dins l’espaci public" ? ¹

Non solament, l’ajustament de l’article 75-1 crèa ges de contèxte novèu mai nos vauguèt per lo premier còp dins l’istòria de la Republica la confession formala de l’abséncia de "tot drech ò de libertat que la Constitucion garantigue". ² Au nivèu internacionau, l’UNESCO establiguèt que França respècta en ren lei convencions que ratifiquèt. En Euròpa, la posicion francesa contresta lo pincipi de non-discriminacion ³ que fondamenta l’Union europenca.

En veritat, podèm que constatar coma la situacion juridica dei lengas regionalas en França se degalha totjorn que mai e l’actualitat nos balha, cada jorn, de cas de discriminacion linguistica.

Fa dos sègles de temps que lo contraròtla mediatic centralizat e la francizacion forçada son una particularitat francesa. Li devèm lo quasi avaliment dei diferentei compausantas dau territòri. A l’ora d’ara, enregoïda dins lo debat sus l’identitat nacionala, la question dei lengas regionalas s’encala. Ai! metèsson l’unicitat e l’indivisibilitat de la Republica en perilh! E de vèire, pertot a l’entorn, en Euròpa particularament, coma sa practica abriva l’envam sociau e economic.

L’IEO (Institut d’Estudis Occitans) denóncia a bèlei uelhs vesents aquesta agarrida nòva de la libertat d’expression e de l’informacion (art. 11 de la Carta dei drechs fondamentaus e art. 10 de la Convencion europenca dei drechs de l’òme).

Exigèm la garentida de l’egalitat en drech de totei lei ciutadans.

NON a la discriminacion de l’occitan.

ÒC a un estatut legau per le lengas regionalas de França.

_

Pèire Brechet,

President de l’IEO


¹. Respònsa dei servicis dau Ministèri de la Cultura e de la Comunicacion dau 12 de febrier de 2012

². Decision dau Conseu constitucionau n° 2011-130 QPC dau 20 de mai de 2011

³. Carta dei drechs fondamentaus de l’Union europenca, Article 21 : « Non-discriminacion : es defenduda, tota discriminacion fondada en particular sus […], la lenga, […]». Article 22 : « l’Union respècta la diversitat culturela, religiosa e lingüistica ».

 

Lire la page en français