Sètz aicí : Acuèlh > Actualitat > Arquius > EBLUL/ELEN-França al Conselh dels Dreches de l’Òme de las Nacions Unidas

EBLUL/ELEN-França al Conselh dels Dreches de l’Òme de las Nacions Unidas

França defugís las questions sus las lengas regionalas, en contradiccion amb los engatjaments de son cap d’Estat

EBLUL/ELEN-França al Conselh dels Dreches de l’Òme de las Nacions Unidas

Los representants del Malhum Europèu per l’Egalitat de las Lengas, EBLUL-França, son intervenguts en novembre de 2012 a Genèva dins lo cadre de l’Examèn Periodic Universal de la França pel Conselh dels Dreches de l’Òme ce pel Conselh dels Dreches de l’Òme de las Nacions Unidas. An prepausat als Estats-membres del grop de trabalh (47 Estats) un ensemble de recomandacions per que la França reconesca e respècte la diversitat de las lenguas e de las culturas de son territòri e las diferentas identitats dels compausants de la societat.

Al temps de la session plenièra del 21 de genièr de 2013, qu’i participèron Paul Bilbao, responsable de Kontseilua pel País Basc, Alexis Quentin, representant de l’Institut d’Estudis Occitans e Tangi Louarn, president de Kevre Breizh per Bretanha, de nombroses Estats-membres son intervenguts per demandar a França de modificar mai que mai sa Constitucion per reconéisser los gropes minoritaris, retirar sas resèrvas sus l’article 27 del Pacte dels dreches civils e politics e sus l’article 30 de la Convencion des dreches de l’Enfant que preve lo respècte de las lengas e de las culturas dels gropes minoritaris e augmentar lo temps de difusion de las lengas regionalas a la ràdio e a la television publicas en lor balhant los mejans financièrs e umans necessaris. Atanben França es convidada a s’associar a las ONGs que defendon las lengas regionalas en seguissent l’Examèn Periodic Universal en cors e a l’elaboracion de son rapòrt venent.

Los delegats d’EBLUL/ELEN-França fuguèron particularament suspreses que, dins sas responsas, la delegacion francesa, menada per En François Zimeray, ambaissador pels Dreches de l’Òme, s’esquiva totalament de las questions concernissent los dreches dels ciutadans franceses a lors lengas e culturas pròprias e la reconeissença de la diversitat lingüistica en França. L’ambaissador s’es contentat de remembrar lo refús tradicional e escandalós de la França a l’agach dels dreches de l’òme, de reconéisser d’autra cultura e d’autra lenga que francesas al nom de l’unicitat de lenga e cultura del pòble francés, que reenvia a una concepcion etnica e non pas politica de la ciutadanetat francesa.

EBLUL/ELEN-França s’espanta tant mai d’aqueste refús de respondre a las recomandacions sus la reconeissença de las lengas regionalas que lo President de la Republica s’èra engatjat a mai d’un còp, dirèctament o per sos ministres, a ratificar la Carta europèia de las lengas regionalas o minoritàrias e a modificar la Constitucion dins aqueste sens. Aquí se trapa una contradiccion màja entre las declaracions oficialas del Cap d’Estat, aquela del Governament e la posicions dels servicis de l’Estat sul terrenh. EBLUL/ELEN-France decidiguèt de’n apelar al Cap de l’Estat.

Per EBLUL/ELEN-França,
Lo 25 de genièr de 2013
Tangi Louarn, Paul Bilbao, Alexis Quentin

 

Lire la page en français
Portfòlio de l'article