Sètz aicí : Acuèlh > Actualitat > Arquius > L’Estivada 2012 foguèt una capitada gigantassa... E l’IEO i èra!

L’Estivada 2012 foguèt una capitada gigantassa... E l’IEO i èra!

L’Estivada 2012 foguèt una capitada gigantassa... E l’IEO i èra!

Dins son taulièr, dubèrt a l’IEO 47-EOE e a IEO-IDECO, l’Institut d’Estudis Occitans a presentat al public del festenal l’ensem dels projèctes menats per l’associacion. A fin de vesprada, un aperitiu tematic s’organizava a l’entorn de las noveltats de nòstras accions : lo novèl visual de la campanha de comunicacion Apprenons l’occitan (per una difusion prevista tre la fin d’agost cap a l’ensemble de las structuras implicadas), las tòcas actualas del labèl Òc per l’occitan, la creacion de la basa interregionala de donadas toponimicas occitana Luòcs a bdtopoc.org. David Grosclaude, conselhièr regional d’Aquitània, Guilhèm Latrubesse, conselhièr regional de Miègjorn Pirenèus, e Gustau Aliròl, conselhièr regional d’Auvèrnhe, i assistèron amb una bona partida dels correspondents de la Comission Toponimica Occitana. Dins lo rèste del temps, administrators, benevòlis e emplegats èran disponibles a tota question o remarca.

Lo President Pèire Brechet, acompanhat del burèu de l’associacion, agut l’escasença de discutir de la problematica occitana amb l’ensems dels actors politics presents, com amb dona Anne-Marie Escoffier, ministra delegada a la decentralizacion e senatritz d’Aveiron, o lo sénher Christian Teyssèdre, conse de Rodés.

E especialament per l’escasença de l’Estivada, foguèron distribuidas de ficas pedagogicas dins lo cadre del projècte de sensibilizacion Bilingüisme aboriu francés-occitan, notadament sus la question dels prenoms occitans e la comunicacion gestuala amb los pichons. Mantunes an pogut descobrir la version occitana de lor pichòt nom e portar de “diplòmas” simbolics a l’ostal.

De’n pertot dins l’estructura bastida dins la Val de Borran, se podián trapar lo desplegant Occitan, qu’es aquò ? e l’annuari del labèl Òc per l’occitan : a l’acuèlh, al restaurant, a l’estanquet, dins de diferents taulièrs. E per aqueles que volián anar mai luènh, lo quizz qu’aviam preparat servissiá de convit per nos rescontrar a l’estand e ne discutir melhor.

Amb un public digne dels mai grands espetacles multiculturals, l’Estivada de Rodés a passat en 2012 a l’etapa superiora e s’es afirmada coma un festenal cultural máger e representatiu d’Occitània. La tòca de l’IEO essent de permetre un accès mai larg a la lenga e cultura occitanas, avèm pas mancat al rendètz-vos d’aquel bèl eveniment e pausat la basa del partenariat venent amb la còla organizatritz. Mercés a totes, benevòlis e public, d’aver partetjat aquel moment amb nosautres !

 

Lire la page en français
Portfòlio de l'article