Sètz aicí : Acuèlh > Actualitat > Arquius > L’IEO a l’Estivada de Rodés

L’IEO a l’Estivada de Rodés

L’IEO aurà aqueste an a l’Estivada un estand bèl ont seràn presentas d’unas seccions de la federacion. Nos i podretz retrobar tota la setmana del festenal, del 27 al 31 de julhet.

L’IEO a l’Estivada de Rodés

 

Al programa :
Dimars 27 de julhet de 17h a 19h : Au rescontre de Jan-Màri Caunet, Autor emb Pascal Bodin e Jan-Francés Vinhau de / Auteur avec Pascal Boudy et Jean-François Vignaud de Memòria de l’aiga : enquête ethnolinguistique sur l’eau en montagne limousine Edicions Doublevébé Récup, 2009. D’abriu de 2007 a junh de 2008, los animators de l’Institut d’Estudis Occitans dau Lemosin se pradeleren sus las vias dau Parc naturau regionau de Miuvachas en Lemosin en tot cherchar la memòria de l’aiga... Una enquesta menada en occitan chas los darriers actors de la civilisacion rurala per portar tesmonhatge d’un pan de memòria tecnica e lingüistica de la montanha lemosina : las levadas, la torba, los molins, l’aiga dins los vialatges…
Espaci Castanhada, banc de l’IEO Lemosin.

Dimècres 28 de julhet de 10h a 11h30 : "Per Rodés amb Joan BODON" Passejada per carrièiras amb lecturas de qualques tèxtes suls luòcs descriches per l’autor.
RV a 10h davant la tenda de l’IEO.

de 17h a 19h : Au rescontre de Jan-Peire Lacomba Son darrier libre / Son dernier livre : Lo dever del vaure (Le devoir de l’abîme), recuelh de poemas en occitan lemosin emb la revirada en francés / recueil de poèmes en occitan limousin avec traduction française en regard, Edicions dau Chamin de Sent Jaume, 2010.
Lo Joan-Peire Lacomba es de per son pair franc Lemosin e de per sa maire, seria quasi d’Auvernha. Li es malaisat destriar los dos parlars que, de tot biais, se semblon plan. Ensaia pasmens de se tener ad un per poema. Faras coma se, legidor, passaras de l’un a l’autre sens te’n estonar. La linga li es de naissent, bona mai genta ; lo mai sovent en daus petits textes calhats ’rieba l’imatge viu, lo saubre-dire ; sem convidats a las sasons d’una natura vesitada per lo mite ; la luna li es de segur vierja de pas d’òme, mas las vachas (que lo fagueron viure) l’i paisson maitot los pasturaus dau ciau, a la broa de la Via Lachada o Chamin de Sent Jaume.
Espaci Castanhada, banc de l’IEO Lemosin.

Dimècres 28 a 18 h : Conferéncia de premsa : Presentacion de la version 2010 de l’Occitan qu’es aquò/ annuari del labèl Òc per l’occitan. Veire l’article.

Dijòus a 14h30 e a 16h30 : presentacion del "Diccionari general occitan" de Cantalausa, en linha, puèi presentacion de "Lenga viva" en linha. Sus l’espaci de l’Institut d’Estudis Occitans.

A 14h puei de 17h a 19h : Au rescontre de Monica Sarrasin. Sos dos libres / Ses deux livres : La Lison dau Peirat (2005), La setmana de la Lison (2007). Edicions dau Chamin de Sent Jaume.
Coma tant d’autres en Lemosin (Jan-Peire Reidi, Jan-Peire Lafont) e alhors, Monica Sarrasin, la retirada venguda, tornet descubrir sa lenga, o pusleu que lo patois de sa jòunessa era ’na lenga que se podiá escrir. E çò qu’avia totjorn raibat de contar, l’istòria de sa tantin, que li venia pas dau tot en francés, eisiguet naturalament sos la fòrma de dos racontes plan plasents (a, n’um s’einuia pas emb la Lison dau Peirat!) : la contairitz es venguda escrivairitz, e dos còps de sega daus prèmis literaris en Vau d’Aran vengueren nos iò far saubre.
A l’Espaci Castanhada (debat literari sus la tematica « cronicas de femnas » - 14h) puei sus lo banc de l’IEO Lemosin.

Dijòus 29 a 18 h : Presentacion de la mòstra Occitània, fargada per l’IEO sus comanda de la Mediatèca Departamentala de Garona Nauta. Preséncia d’una representanta de la bibliotèca departamentala : Alexandra Bousquet. Veire l’article de presentacion de la mòstra aicí.

Divendres 30 de julhet de 10h a 11h30 : "Per Rodés amb Joan BODON". Passejada per carrièiras amb lecturas de qualques tèxtes suls luòcs descriches per l’autor. RDV 10h davant la tenda de l’ieo.

A 14h : Jaumet Demesa presentarà la reedicion de L’Òme Sortit de la Mar, IEO edicions, 2010 dins l’encastre d’un debat sus la literatura joinessa.
Sus l’espaci Castanhada.

A 14h puei de 16h a 17h30 : Au rescontre de Domenica Decomps. Sos tres darriers alboms / Ses trois derniers albums : Lo drolisson de névia (2004), Lo margalhon e la bossòla (2006), Lo chat, la cana e la chabra (2009). Edicions CRDP Aquitània. Professora d’occitan en Corresa (IUFM de Tula e Collegi de Selhac), a revirat o produich una seria de 13 alboms publiats au CAP’Oc, antena dau CDDP de Pau per çò qu’es de las publicacions pedagogicas en occitan per l’ensenhament de quela lenga dins totas sas fòrmas (iniciacion, sensibilizacion, immersiu, bilingüe). Emb chasque albom l’i a un CD que ufrís tres varietats d’occitan (lemosin, lengadocian, gascon) e una version francesa. Daus còps, son daus alboms de creacion o mai sovent daus contes tradicionaus tornats escrichs e adaptats a çò que fai mestier per las classas de lenga. Quilhs albums son maitot per los beus que cherchen un biais de parlar riche e atractiu. Faguet partida de los que farjeren l’ensemble Oc-ben, metòdi d’aprendissatge de l’occitan dins sa version lemosina.
Sus l’espaci Castanhada a l’entorn de la tematica de la literatura joinessa (14h) puèi sus lo banc de l’IEO Lemosin.

De 16h a 17h : cors d’occitan. Tematica “lo vocabulari de basa per comunicar a l’Estivada”. Animat per Guilhem Boucher de l’IEO d’Òlt.
Sus l’espaci de l’IEO.

Divendres 30 a 18 h :Joan-Loís Lavit, President de la jurada e Pèire Brechet, President de l’Institut d’Estudis Occitans balharàn lors prèmis als dos autors ganhants del concors de literatura joinessa. Legir l’article

  • Tota la setmana:
    • Jòcs a l’entorn del collectatge: escotatz de tròces e ensajats de transcriure çò dit!
    • Mòstra Occitània : a la descobèrta d’Occitània dins totes sos aspèctes acompanhat del document l’occitan qu’es aquò novèla version. Testatz las vòstras coneissenças amb lo Quizz.
    • Navegacion liura per descubrir los sitis www.emplec.com e www.paginas-occitanas.com.

Mai d’informacion sus www.estivada-rodez.eu.

De reténer, d’aqueste temps, lo burèu de l’IEO serà tancat tot lo temps del festenal : del 27 al 31 de julhet.

Lire la page en français