Sètz aicí : Acuèlh > Nòstras missions > Ensenhar l’occitan > Aprenem l’occitan ! L’occitan, je m’y mets ! > Campanha 2010-2011 "Aprenem l’occitan ! L’occitan, je m’y mets"

Campanha 2010-2011 "Aprenem l’occitan ! L’occitan, je m’y mets"

« Aprenem l’occitan », la 4ena campanha de promocion dels corses d’occitan per adultes. Apréner una lenga es pas reservat als escolans, collegians, liceans e, urosament, es pas jamai tròp tard per s’i metre. Sustot quand s’agís de la lenga occitana.

Campanha 2010-2011

I a prèp de l’ostal un malhum mai que bèl de corses, estagis d’estiu, estagis intensius immersius, corses per correspondéncia, corses del ser, per debutants o per locutors avançats. Tot i es !

Actu ! En novembre de 2010, lo site Aprenem l’occitan a cambiat de cara. Ara, lo site albèrga tanben tot çò que concernís Parlesc, lo labèl de las estructuras que balhan corses d’occitan per adultes. Lo podètz consultar : www.aprenemloccitan.com.

 

Qual pòt seguir aqueles corses ?
Pels demandaires d’emplec en reconversion professionala, l’occitan es un mai que pòt donar un emplec. Pels parents qu’an un dròlle escolarizat en escòla bilingua o calandreta, conéisser l’occitan permet d’acompanhar lo mainatge dins son aprentissatge. Pel personal encadrant dels ostals de retirada, espitals, aquò permet d’èstre mai pròche del pacient. Per las professions ligadas al torisme o los productors lcals, aquò balha una identitat originala, ligada al país. Mas, de tot biais, apréner una lenga, sustot l’occitan, aquò a pas besonh de passar forçadament per d’arguments utilitaris. Òm apren l’occitan mai que mai pel plaser, e amb plaser. Plaser de comunicar dins la lenga d’aicí, plaser d’accedir a una cultura rica sus mantunes aspèctes.

« Aprenem l’occitan ! l’occitan je m’y mets ! » es un supòrt d’informacion qu’es aquí per informar sus totes los corses d’occitan qu’existisson. Ongan es la quatrena annada que se fa. Es relaiada pels 270 corses d’occitan que son sus tota la region occitanofòna, per de comunas, de Conselhs Generals e de Comunautats d’Aglomeracion que meton a dispausicion los malhum d’aficatge bus, de Conselhs Regionals.

Contact
Vautres tanben, vos podètz informar a prepaus dels luòcs de corses, las actualitats ligadas a aqueles corses, estagis, formacions, etc. e autras entresenhas sul site :
www.aprenemloccitan.com,
contact@aprenemloccitan.com
o al :
0800 74 69 64 (nº verd, apèl gratuit dempuèi un pòste fixe).

Existís un fum de rasons per apréner l’occitan, mas una sola sufís, alavètz Aprenem l’occitan !


« Aprenem l’occitan ! l’occitan je m’y mets » es una campanha d’informacion suls corses d’occitan per adultes menada pet l’Institut d’Estudis Occitans, los Centres de Formacion Professionala Occitans e l’Escòla Occitana d’Estiu. A lo sosten del Conselh Regional Miègjorn-Pirenèus, del Ministèri de la Cultura, del Conselh Regional de Ròse-Alps, del Conselh General d’Òlt, del Conselh General de Tarn, de la Comunautat d’Aglomaracion de Perigüers, de la Comunautat d’Aglomeracion de Besièrs-Mediterranèa, del Conselh Regional Peitau-Charanta, del Conselh Regional PACA.

 

Lire la page en français
Portfòlio de l'article