Sètz aicí : Acuèlh > La lenga occitana > L’occitan uèi

L’occitan uèi

Dins l’economia, dins los mediàs o sus nòstres ordenadors e nòstres logicials, l’occitan a uèi sa plaça. Aquestes tres aspèctes son aicí desvelopats.

L’occitan uèi

Una economia occitana

Pauc a pauc, dempuèi las annadas 80, lo s emplecs ligats a la lenga occitana se desvelopan. Parlar occitan es una competénica uèi percaçada, subretot s’es combinada a d’autres saupre-far.

 

La màger part dels pòstes ont aquesta coneissénça es demandada son ligats a l’ensenhament, mas tanben als mediàs, a l’animacion culturala, al torisme, a la creacion artistica o als mestièrs del libre. I a quitament mai de creacions de pòstes dins aquestes domènis que de diplomats que sortisson d’un cursus universitari ligat a l’occitan.

La promocion de la lenga dins l’economia es un dels mai bons vectors de sa socializacion. Divèrsas iniciativas valorizan l’occitan dins la vida publica coma lo labèl Òc per l’occitan que favoriza l’emplec de la lenga dins l’activitat professionala e l’economia.

Emplec.com es l’agéncia per l’emplec ligat a l’occitan vist coma compteténcia professionala. Aquesta lenga es pas un critèri particular dins las agéncias per l’emplec, l’Institut d’Estudis Occitans e Viure e Trabalhar al País an alavètz creat aqueste site.

Paginas Occitanas es l’annuari dels artistas e actors culturals occitans, un equivalent de las paginas jaunas ligat a la cultura occitana.

De las collectivitats cap a las entrepresas, las culturas e identitats localas son uèi mesas en davant del punt de vista del torisma coma de l’economia.


Quines mediàs per l’occitan ?

La preséncia d’una lenga dins los mediàs es un factor clau de sa transmission, notadament en cò dels mai joves. E pel cas de l’occitan ?

 

La premsa escicha
Dempuèi lo sègle XIX, se son desvelopats periodics integralament en occitan atal coma las revistas literàrias Òc o Reclams, o lo setmanièr d’adtualitat La setmana. Çaquelà, l’occitan ten una plaça confinhada dins un registre minor dins los grands grops de premsa. Cal permetre a l’occitan de venir una lenga de comunicacion e d’informacion dins son entièr per veire se desvelopar sa preséncia dins la premsa.

La radio
Fàcia a la rompedura de la transmission familiala, la ràdio es lo servici de proximitat que permet de tornar introdusir la lenga dins los ostals. Radios associativas coma Ràdio País, Ràdio Occitània ou Ràdio Lengadòc bastisson lor grasilha editoriala a l’entorn de l’occitan sus las ondas coma sus internet.
La plaça balhada a l’occitan dins las ràdios de servici public es menora. Pasmens la mutualizacion d’antenas e d’emissions dins d’unas regions deuriá far créisser lo temps consacrat a l’occitan sus las ondas.

La television
En Miègjorn-Pirenèus, Lengadòc-Rosselhon, Provença e Aquitània, France 3 prepausa d’emissions de 6 a 26 minutas per setmana. La màger part de las lengas minoritàrias d’Euròpa profièchan de programas importants quora es pas d’una o mai d’una cadena.
Aquesta situacion es lo rebat d’una inegalitat de la diversitat culturala francesa.

Internet
La difusion de mediàs via internet necessita pauc de ressorças e permet doncas una comunicacion occitana mai granda. Revistas numericas, web-tv, sites internet, blògs e foròms a l’entorn d’aquesta cutlura se trapan en abondi sus la tèla .


L’informatica en occitan

Sites, blògs, foròms e malhums sociaus... Los escambis escrits en occitan an jami estat tan nombroses dempuèi lo desvelopament d’internet.

 

Alara que l’occitan foguèt pas totjorn valorat sus la plaça publica, de mai en mai d’associacions, festenals, comercis en linha o institucions prochièchan del web per comunicar totalament en occitan o d’un biais bilingue.

« L’objectiu d’ara endavant es de poder provesir als occitanofòns d’aisinas dins lor lenga. »
Alain Alcouffe, universitari.

De servicis son instituats per e a l’entorn de l’occitan.

  • Lo Servici de l’emplec (emplec.com) centralisa las ofèrtas d’emplec que valorizan la mestresa de l’occitan.
  • La Pòrta d’òc (laportadoc.eu) es un portalh que repertòria los sites, actualitats e eveniments occitans.
  • Las paginas occitanas (paginas-occitanas.com) es l’annuari dels artistas e actors culturals occitans.

E mantunes projèctes liures e participatius atals coma Wikipédia an lor version occitana (oc.wikipedia.org).

Nombre de logiciaus libres son descargables gratuitament en occitan amb un interfaci en occitan. Lo sistèma d’explotacion libre Ubuntu f oguèt tradusit en occitan per Tot en òc.

Aqueste sistèma propausa un grand nombre de logiciaus que se pòdon tanben descargar e utilizar jos Windows o Mac. Podèm aital profiechar de las versions occitanas de Firefox, Thunderbird, OpenOffice, VLC e plan d’autres encara…

Lire la page en français