Sètz aicí : Acuèlh > Actualitat > Arquius > La lèi de refondacion de l’escòla: quand la mobilizacion paga!

La lèi de refondacion de l’escòla: quand la mobilizacion paga!

L’Institut d’Estudis Occitans se benastruga de l’adopcion, per l’Assemblada Nacionala, aqueste 5 de junh de 2013, de la lèi de refondacion de l’escòla dins sa novèla version que dona enfin de drechs ai lengas regionalas.

La lèi de refondacion de l’escòla: quand la mobilizacion paga!

Li trobam una avançada dins sa reconoissença ambé la possibiltat d’ensenhament de lenga e en lenga. E fòrça important, li dona un estatut juridic de referéncia clar e declarat (cf. annèxa).

Adonc, l’IEO regracia aicí totei lei sòcis, seccions e simpatizants qu’an respondut a sei rampeladas de mobilizacion e/ò que prenguèron d’iniciativas per faire pression sus lei decideires e quichar totjorn mai sus lei decisions!

La mobilizacion a pagat!

Es una victòria collectiva de l’ensems dau movement associatiu occitan mai tanben deis autrei lengas de França e deis elegits (totei tendéncias mescladas) que se son engatjats e an sostengut e afavorizat nòstrei revindicacions.

La lèi de refondacion (emai siegue pas perfiecha que manca entre autra l’ensenhament per immersion) es un progrès a rapòrt de tot çò que se faguèt fins ara per lei lengas regionalas, li duèrbe de pòrtas per un avenidor positiu de desvolopament.

A nautrei, ara, d’èstre pron vigilants e eficaç per que demòran dubèrtas!

La mobilizacion contunha!

Avèm una novèla lèi mai sabèm totei que basta pas, que fau encara que siegue aplicada e si concretize dins leis actes.

Sabèm d’autra part que lei compausantas dei Institucions, Collectivitats e autrei administracions, elei, an pas cambiat e qu’aurem segurament encar e totjorn de s’acarar a de temptativas d’empacha de tota mena!

Lo Ministre a fach, un còp de mai, d’agradivas promessas (pòstes en mai, informacion dei familhas…), ara fau que lei tengue!

Avèm ganhat una plaça dins l’ensenhament, òsca, mai bastarà pas per l’espandiment de la transmission s’es pas completada per una preséncia dins la vida publica, lei medias e tot çò qu’afavoriza la socializacion… totei plaças qu’avèm d’ocupar!

Alora, contents e satisfachs? Òc segur! Mai totjorn aquí, tant testards e combatius!

Anem zo! Tornem-se metre a l’òbra!

Pèire Brechet
President de l’Institut d’Estudis Occitans

 

Lire la page en français
Fichièrs de descargar