Sètz aicí : Acuèlh > Letra d’informacion > Letra en occitan > Letra d’informacion n° 7 - Novembre de 2010

Letra d’informacion n° 7 - Novembre de 2010

Letra d’informacion n° 7 - Novembre de 2010

Aquesta letra presenta los darrièrs articles pareissuts dempuèi un mes sul site internet de l’IEO. S’apondon las nòvas ligadas a la lenga occitana e a la vida federativa de l’IEO.

Los 26 e 27 de novembre a Privàs (07) se tendrà lo collòqui sul Desvelopament de l’acuèlh bilingüe dins lo domeni de la petita enfança. Organizat per l’IEO a l’IUFM d’Ardècha. En seguida del collòqui de 2009 organizat a Tarba (65), las tematicas s’adralharàn aqueste an suls interès del bilinguisme precòç e las possibilitats de sa mesa en practica institucionalament o al dintre de grèpias e autras estructuras d’acuèlh. Inscripcion gratuita, repais: 15€. Butletin d’inscripcion. Programa. Article de presentacion sul site de l’IEO.

Lo Volontariat per l’occitan bota en relacion un "Volontari" que mestreja l’occitan correntament, amb un "Aprenent" que sap las basas de l’occitan e que vòl préner d’assegurança. Aprèp aver recampat luòc d’acuèlh per aquestas discutidas, es posible ara de se marcar coma Aprenent o Volontari, de descargar lo Còde de bonas practicas. Despachatz vos, començam en debuta de genièr. Mai d’informacions.

Vilanòva de Magalona. Lo patrimòni toponimic istoric occitan es censurat. Lo tribunau administratiu de Montpelhièr condemna lei panèus qu’indican en occitan lo nom d’una comuna. Lo comunicat de l’IEO a prepaus d’aqueste eveniment. Aicí

Ajudatz l’IEO Far un don a una associacion reconeguda d’interès public tal coma l’Institut d’Estudis Occitan vos permet de dedusir dels vòstres impòstes 66% de la soma balhada a l’associacion. Significa que per un don de 100€, beneficiatz d’una reduccion de las talhas de 66€, e pagatz finalament sonque 34€. Fasètz un don abans lo 31 de decembre de 2010 per poder profiechar d’aquesta reduccion per vòstra declaracion venenta. Mai d’informacions.

La mòstra Occitània realizada per l’Institut d’Estudis Occitans e la biblioteca departamentala de Garona Nauta vira totjorn. Après l’Estivada 2010, aqueste estiu a Rodés, venètz la veire fins al 30 de novembre a la biblioteca de Montgiscard (31). Serà puèi a la biblioteca de Mondonvila del 25 de genièr fins al 25 de febrièr de 2011. A l’agach de son succès a l’Estivada, aquesta mòstra se pòt excepcionalament prestar per una circulacion fòra de Garona Nauta. Sus demanda alprèp de l’IEO.

Vejaire, la novèla rubrica del nòstre site recampa los comunicats de l’IEO ligats a l’actualitat. Entre autres, lo comentari de l’IEO suls panèus d’entrada de vila de Vilanòva de Magalona. A trobar sus aqueste camin: Acuèlh > Conéisser l’IEO > Vejaire.

Nòstras rubricas s’actualizan e s’enriquesisson per aquestes que ne vòlon saupre mai sus la lenga e la cultura occitanas (articles largament inspirats de l’occitan qu’es aquò). Veire tota la rubrica sul site.
A començar per una nòva: Quina es la plaça de l’occitan uèi? (dins los mediàs, l’informatica e internet e plan segur dins l’economia). L’article sul B.A-BA de la prononciacion occitana s’enriquesís uèi de qualques frasas tipicas per se petassar en occitan e aplicar las vòstras leçons. Arribaretz a legir en occitan? D’ont ven l’occitan ? De qu’es aquesta lenga ? Un pauc d’istòria per ne saupre mai. E totjorn : La mapa del territòri occitan, la diferéncia (se n’i a) entre lo patoés e l’occitan.

Lire la page en français