Sètz aicí : Acuèlh > Letra d’informacion > Letra en occitan > Letra d’informacion n° 8 - Decembre de 2010

Letra d’informacion n° 8 - Decembre de 2010

Letra d’informacion n° 8 - Decembre de 2010

Aquesta letra presenta los darrièrs articles pareissuts dempuèi un mes sul site internet de l’IEO. S’apondon las nòvas ligadas a la lenga occitana e a la vida federativa de l’IEO.

De nòu dins la còla. Lo director, Jan Morèu partís en congièr de paternitat per la durada d’un an a comptar de la debuta de genièr. Per assumir sas missions tot aquel temps, l’Institut d’Estudis Occitans ven d’aculhir Laurenç Gosset que podrètz contactar al sèti de l’IEO a Tolosa pels biaisses costumièrs. Veire l’article La còla salariada.

Lo collòqui sul bilingüisme e pichona enfança se debanèt a Privàs los 26 e 27 de novembre. D’extraches d’aqueles dos jorns serán lèu accesibles avans benlèu la sortida dels actes en DVD. Per l’ora, podètz vos procurar los actes del congrès de Tarba de 2009. En seguida de l’eveniment d’aqueste an, un document per promòure lo bilingüisme precòç será difusat als joves e futurs parents dins los luòcs d’acuèlh de la pichona enfança dins los departaments partenaris: Maternitats, ginecològs… La seguida aicí.

Aurelhan, la vila Òc per l’occitan. Lo dijòus 16 de decembre a 15h a d’Aurelhan (65), lo conse e l’Institut d’Estudis Occitans faràn una conferéncia de premsa per anonciar l’engatjament d’aquesta comuna al ras de Tarba dins la labellizacion Òc per l’Occitan de las collectivitats. Serà la primièra collectivitat de tota Occitània a s’engatjar dins aqueste labèl creat per l’IEO e l’Ofici per l’occitan per encoratjar la preséncia de l’occitan dins la vida publica. Per mai d’informacions sul labèl per las collectivitats, contactatz l’IEO.

Volontariat per l’occitan Es totjorn moment de s’inscriure al projècte Volontariat per l’occitan. Aprener melhor l’occitan o ajudar de debutants pel biais simple d’una conversa, e aver l’escasença subretot de practicar la lenga. Aquò’s l’idèia del volontariat que se debanarà pendent dètz semanas a comptar del 3 de genièr fins al 13 de març. Per ne saupre mai.

Aprenem l’occitan. Dempuèi 4 ans, Aprenem l’occitan, l’occitan je m’y mets! es una campanha que permet de valorizar totes los corses d’occitan per adultes qu’existisson. Aprenem l’occitan ! es tanben un site internet que ven tot bèl just de cambiar de cara. A l’iniciativa dels Centres de Formacion Professionala Occitans, de l’Institut d’Estudis Occitans e de l’Escòla Occitana d’Estiu, lo site albèrga tanben tot çò que concernís Parlesc, lo labèl dels corses per adultes. Lo podètz consultar : www.aprenemloccitan.com. L’article sul site.

L’Ofici per l’Occitan au SISQA,, lo Salon de la qualitat Alimetària de Miègjorn Pirenèus (SISQA) que se debana a Tolosa del 9 al 12 de decembre. L’occitan i será doncas plan present amb una conferéncia sus la valoracion dels produits econonomics per l’occitan amb quatre labellizats Òc per l’occitan convidats. Una conferéncia d’escotar lo divendres 10 de decembre a 16h30 al SISQA.

Senhaletica a Vilanòva. L’IEO a difusat lo sieu comunicat de sostien a la manifestacion del 11 de decembre a Vilanòva de Magalona. La tòca : defendre la preséncia publica de l’occitan suls panèus de dintrada de vila, panèus direccionals o de carrièras. Per anar contre l’efièch dissuasiu que pòt avèr aqueste afar menat en justícia, lo senator de l’Aude Roland Courteau propausa una lei : Cambiar lo còdi de la rota per evitar que de procèsses aital se tòrnen far contre la senhalizacion bilingüa. Article e comunicat de l’IEO.

Lire la page en français