Sètz aicí : Acuèlh > Letra d’informacion > Letra en occitan > Letra d’informacion n° 9 - Genièr de 2011

Letra d’informacion n° 9 - Genièr de 2011

Letra d’informacion n° 9 - Genièr de 2011

Aquesta letra presenta los darrièrs articles pareissuts dempuèi un mes sul site internet de l’IEO. S’apondon las nòvas ligadas a la lenga occitana e a la vida federativa de l’IEO. Bona annada a totes !

Lo diplòma de Competéncia en lenga (DCL) en occitan. Existissiá ja per las lengas estrangièras, puèi pel breton. Ara es dubèrt a l’occitan. Aquel diplòma d’Estat balha una reconeissénça vertadièra del nivèl de lenga, especificament sul plan professional. L’IEO a participat a l’elaboracion del DCL occitan. La primièra session experimentala se debana lo 5 de febrièr avans la session oficiala lo 21 de mai de 2011 dins las acadèmias de Bordèu, Tolosa, Montpelhièr. Marcatz vos tre ara. Per ne saupre mai sul DCL e veire l’article.

Aurelhan, engatjada per l’occitan. Lo 16 de decembre, la comuna d’Aurelhan, pròche de Tarba, s’es engatjada a metre en plaça cinc accions per la lenga occitana. Aquò li permetrà de recebre lo labèl Òc per l’occitan de las collectivitats un còp lo tot en plaça, d’aquí a cinc ans maximum. Las tòcas venentas a l’ora d’ara son collectivitats mai grandas coma per exemple la vila de Tolosa, Tarba o la Region Miègjorn Pirenèas. Lor engatjament per la lenga perpermetriá una dinamica fòrta alprèp d’autras collectivitats. Veire l’article

Volontariat per l’occitan : lançament de l’operacion. Lo 3 de genièr, los participants inscrits al Volontariat per l’occitan van poder començar de se rescontrar per charrar en occitan e se desirar la bona annada. Se trantalhatz encara per vos inscriure en tant qu’aprenent es encara possible sus unas regions d’Occitània. En efièit, lo programa Volontariat per l’occitan a sedusit mai de Volontaris que d’aprenents. Es doncas encara possible de profitar de la bona volontat de personas amb una lenga de qualitat.S’inscriure coma Aprenent. veire mai en detalh lo programa.

Parucion dels actes del congrès toponimia de 2007 a Aush. En 2007, l’Institut d’Estudis Occitans organizèt un congrès a Aush (32) titolat Toponimia occitana e senhalizacion bilingua. Los actes son ara accessibles a la lectura per cadun. S’i trapan los elements juridics, tecnics e financièrs per poder metre en plaça una senhalizacion bilingüa dins sa comuna o sus las rotas. Per consultar los actes complets. Legir l’article

Lexics terminologics. Es totjorn moment de comandar los lexics publicats per l’IEO amb una l’ajuda d’una còla de lingüistas representants de l’ensèm dels dialèctes occitans sus tematicas divèrsas. Matematicas, biologia, informatica, son mai de 400 mots per libròt que permeton d’emplegar una lenga modèrna, tant dins l’ensenhament coma dins la vida publica e professionala. Descargar lo bon de comanda. Enmai : Lexic de telefonia mobila : gratuit. Disponible aicí o de demandar per mail.

Bonna annada a totes. L’Institut d’Estudis Occitans vos desira una bona annada, plan granada e plan acompanhada !

Lire la page en français