Sètz aicí : Acuèlh > Nòstras missions > Viure l’occitan cada jorn > Labèl Òc per l’occitan > Lo labèl "Òc per l’occitan !" e sa carta

Lo labèl "Òc per l’occitan !" e sa carta

L’annuari Òc per l’occitan es dempuèi 2010 un labèl per valorizar l’emplec de l’occitan dins la vida economica. Aquel annuari recampa ara mai de 170 comerçants, artesans, associacions, professions liberalas… que recebèron lo labèl Òc per l’occitan.

Lo labèl

Una labellizacion de las collectivitats localas sul meteis principi es lançat. Mai d’entresenhas.

Per commandar d’exemplaris (gratuits), obténer una labellizacion d’entrepresa o de collectivitat locala, contactatz l’IEO o l’Ofici per l’occitan. Segon la quantitat, una participacion als fraisses de pòrt serà demandada.

Per descargar l’occitan qu’es aquò/ Labèl òc per l’occitan en pdf:
(Clicada drecha e "enregistrer la cible du lien sous...")

Descargar solament la carta del labèl en pdf.

 

La carta del label Òc per l’occitan

Aquel annuari recampa en 2015 mai de 170 comerçants, artesans, associacions, professions liberalas… que recebèron lo labèl Òc per l’occitan.

Qu’es aquò ?
Aquesir lo labèl, es dire sa volontat de botar en abans una identitat originala.

Es mostrar una sensibilitat de cap a la lenga occitana e lo desir de ne favorizar la socializacion.

Per una entrepresa, una estructura, recebre lo labèl Òc per l’occitan es dintrar dins un malhum de consomators demandaires d’un servici en occitan, de produits qu’afichan l’occitan.

Es tocar un public novèl, quitament per delà las frontièras en fasent mai aisits los escambis amb los autres païses de lenga romanica (Espanha, Portugal…).

Se cada labelizat s’engatja a promòure l’occitan e lo labèl, causís puèi, segon sas competéncias, l’emplec que fa de la lenga.

Per aquò, foguèron definits tres nivèls de certificacion :

Nivèl 1 Aicí l’occitan nos agrada
Aicí trobaretz, de segur, una preséncia escrita de l’occitan, e benlèu vòstre interlocutor comprendrà la lenga.

 

Nivèl 2 Aicí parlam occitan
Se la lenga se fa veire sus un o mai d’un supòrt escrit, sètz tanben assegurats de trobar al mens una persona per vos servir en occitan.

 

Nivèl 3 Aicí l’occitan es pertot
L’occitan es lenga primièra de comunicacion tant a l’oral coma a l’escrit, dins los escambis intèrnes e extèrnes.

 

Los servicis ligats al label :
Oc per l’occitan assegura la promocion de l’apellacion e de sos aderents mercé a una comunicacion especifica :

  • Creacion d’una pagina personalizada que presenta cada labelizat, mesa a jorn regularament sul site internet : www.occitan-oc.org.
  • Edicion e difusion d’aqueste annuari publicat cada an.
  • Promocion e preséncia del labèl Oc per l’occitan dins de fièras de productors, oficis e luòcs de torisme, estructuras ligadas a la lenga e la cultura occitanas.
  • Conferéncias de premsa.
  • Material gratuit per valorizar l’occitan dins vòstra activitat : pegasolets, logò / diplòma del labèl, lexics…

Los servicis en mai :

  • Mesa en relacion amb maitas entrepresas demandairas de servicis en occitan.
  • Servici lingüistic d’acompanhament e de valorizacion de la lenga.
  • Un servici de revirada pels diferents supòrts publicitaris : prospèctus, senhaletica, site internet, etiquetas… 0,13 € lo mot. 200 primièrs mots ofèrts. Pel demai vos podètz referir al servici reviradas de l’IEO
  • Formacion del personal a las basas de la lenga occitana (prètz a estudiar).
  • Inscripcion e mesa a jorn de las donadas de cada labelizat sul site internet de las Paginas occitanas (www.paginas-occitanas.com).
  • Difusion de las vòstras ofèrtas d’emplec ont fa mestièr la conéissança de l’occitan coma competéncia sus www.emplec.com.

Per aver lo label :

  • D’engatjaments son a préner jos la forma d’accions realizablas pendent l’annada de labelizacion.
  • D’unas accions son obligatòrias segon lo nivèl : informacion al personal sus la lenga occitana, informacion al personal sus çò qu’es lo labèl Oc per l’occitan, visibilitat d’aquel labèl al public e difusion d’aquel annuari.
  • D’autras accions son facultativas e es a cadun de causir la que li conven lo mai, entre per exemple : messatge bilingüe sul respondeire, produit etiquetat en occitan, publicitat en occitan, papièr a letra e comunicacion de basa bilingua, anóncias oralas en occitan, ensenha en occitan, site internet bilingüe, formacion dels novèls emplegats a l’occitan.
  • Per aderir, una convencion es a signar entre l’Ofici e l’organisme certificat, mencionant los engatjaments preses per valorizar la lenga occitana. Contactatz-nos per tot aquò.
  • L’adesion de basa al label comprenent los servicis citats es de calcular segon la grasilha de tarifas çai jos. Lo prètz dels servicis atal coma la formacion al personal es a estudiar segon la demanda.

Grasilha de tarifas

Estructura de
< 10 emplegats 30 €/ an.
11 a 20 emplegats 70 €/ an.
21 a 50 emplegats 150 €/ an.
51 a 100 emplegats 200 €/ an.
101 a 300 emplegats 300 €/ an.
> 300 emplegats 300 € +50 €/cada 100 emplegats de mai. (Ex 650 €/ 1000 emplegats.)

Un malhum per totes

  • Parlatz occitan, sètz a l’aprener mas es dificil de poder practicar la lenga dins la vida vidanta. Aquí un guide que vos indicarà ont far las vòstras crompas en occitan.
  • En causissent de consultar de preferéncia lo monde repertoriat dins aquel annuari, contribuïretz al desvolopament d’una economia occitana, en occitan.
  • Fa pas gaire, l’occitan èra lenga correnta dins las comunicacions oralas per carrièra. Ara s’es aflaquit, mas en tot far vòstras crompas en occitan participaretz a la reconquista de l’occitan dins la vida vidanta.

Alavètz gausatz parlar occitan pertot, en tota circonstància !

Se sètz pas encara segurs de vos, podètz afortir las vòstras coneissenças en occitan, per totes los atges, per cada nivèl.
Mai d’entresenhas sus www.aprenemloccitan.com
contact@aprenemloccitan.com
05 34 44 97 11.

Lo certificat Oc per l’occitan es una iniciativa de l’Ofici per l’occitan en partenariat amb l’Institut d’Estudis Occitans.

Ofici per l’occitanInstitut d’Estudis Occitans
11, carrièra Malcosinat 11, carrièra Malcosinat
31000 Tolosa 31000 Tolosa
05 63 45 10 17 05 34 44 97 11
ofici@occitan-oc.org direccion@ieo-oc.org
www.occitan-oc.org www.ieo-oc.org

Article ligat : L’Occitan qu’es aquò e lo label Òc per l’occitan.

 

Lire la page en français
Fichièrs de descargar