Sètz aicí : Acuèlh > Actualitat > Arquius > Oficializacion de Luòcs, basa de donadas toponimicas occitanas

Oficializacion de Luòcs, basa de donadas toponimicas occitanas

Lo divés 27 de julhet, au parat de l’Estivada, lo President de l’Institut d’Estudis Occitans, Pèire Brechet, capdau deu projècte, segondat per Domenge Château-Annaud, administrator encargat deu desvolopament d’accions numericas en çò de l’associacion, que presentè aus elegits e aus membres presents de la futura Comission Toponimica Occitana, la basa interregionau deus toponims occitans : bdtopoc.org

Oficializacion de Luòcs, basa de donadas toponimicas occitanas

Aqueste utís, desvolopat per l’associacion desempuish quasiben ua annada, qu’ei unic. En efèit, quan fòrça sites e son bastits tà presentar d’accions locaus en favor de la memòria deus toponims occitan, que sia dens un parçan com dens un departament o ua region, aquesta basa de tribalh que permeterà a cadun de viatjar dens l’ensemble de l’espaci occitan. Dedicat au gran public com au monde scientific, lo site que se vau presentar com un utís a vocacion de socializacion com d’oficializacion deus toponims occitans. L’IEO, pr’amor de la soa accion en favor de la presa en compte de la lenga dens la vida vidanda, qu’avè donc tota legitimitat e credibilitat scientifica a portar un projècte que serà tanben obèrt au monde exterior, tant associatiu com universitari.

Lo site qu’avó tre la soa presentacion, la reconeishança de las institucions dab la preséncia de mei d’un elegit regionau (David Grosclaude per Aquitania, Guilhem Latruvèrsa per Miègjorn-Pirenèus, Gustau Alirol per Auvèrnhe) e de dauna Simona Anglada, vice-presidenta deu Conselh generau d’Avairon. Tots que’s felicitèn de la demarcha com de l’esquèma de desvolopament presentat peu President Brechet. L’ensemble deu territòri occitan qu’ei déjà present suu site, e per 90% deus departaments, l’ensemble deus toponims occitans de la basa INSEE que son presentats.

La Comission Toponimica Occitana, o CTO, que recampa correspondents e expèrts de l’associacion mes tanben personalitats exterioras. Qu’aurà per tòca de validar chic a chic la demarcha e los toponims causits. De mei, las perspectivas de desvolopament que son importantas, com ac permet lo site : cada toponim a ua ficha precisa que se poderà, en foncion, consultar peu gran public o mercés a un accès privilegiat per la recerca, e anar dinc au nivèu deus micro-toponims. Enfin, l’evolucion de las technologias qu’ei presa en compte, dab la possibilitat de mudar a la demanda de cap a d’utós e logiciaus libres.

L’IEO qu’afirma atau la soa volontat de se posicionar com un operator incontornable per la question de l’usatge e de l’oficializacion deus toponims occitans. Atau, l’IEO que responè viste e plan, gràcias a la mobilizacion deu son malhum, au desfís perpausat.

 

Lire la page en français
Portfòlio de l'article