L’Institut d’Estudis Occitans es una associacion creada en 1945 qu’a per tòca lo contunh e lo desvelopament de la lenga e de la cultura occitanas dins son ensem.

Objectius
Tot lo mond que son a l’ora d’ara a l’IEO trabalhan per que l’occitan trapèsse sa plaça legitima, la d’una granda lenga d’Euròpa. Es per aquò que l’IEO se bolèga per obtenir una plaça mai importanta per l’occitan dins la vida publica, los mèdias, l’ensenhament.

 

L’IEO es tanben una accion quotidiana de cada aderent per que la cultura occitana siague una cultura viva e contemporanèa, creatritz e innovanta, qu’assuma tanben son istòria.

L’IEO es la volontat d’amassar los esfòrces de totes los que vòlon que l’occitan trapèsse sa plaça dins una diversitat culturala essenciala dins la societat d’uèi.

Aquesta batesta, venètz la partejar ambe nautres, los 1500 aderents e 40 emplegats que trabalhan dins las diferentas associacions federadas del malhum de l’IEO. Podètz vos marcar dins l’una de las 28 seccions despartamentalas e 7 seccions regionalas que federam, o directament alprèp de l’IEO nacional.

L’IEO sosten la promocion e l’ensenhament de l’occitan dins lo respècte de sa diversitat dialectala. L’IEO recomanda l’emplec de la grafia que se ditz classica o normalizada que permet lo respècte d’aquesta diversitat dialectala e lo de l’unitat de la lenga. Es la grafia admetuda oficialament pe l’ensenhament de l’occitan sus l’ensem de son airal, comprés lo Val d’Aran e las valadas occitanas d’Itàlia.

Fonccionament en malhum.
L’IEO es una associacion lei 1901 reconeguda d’utilitat publica (1949) e agreada Joinessa e educacion populara (1986).

Podèm aderir a l’IEO siá per l’intermediari d’una seccion departamentala (o en cas, regionala), siá per una adesion dirècta a l’IEO nacional. Dins los dos cases, lo prètz d’adesion es lo meteis.

L’IEO es dubèrt a totes los que desiran la promocion e lo desvelopament de l’occitan e se reconéisson dins las tòcas e orientacions de l’associacion.

L’IEO es organizada en seccions regionalas, seccions departamentalas e cercles locaus que cubrisson l’ensem de l’airal occitan. Cadun assegura los objectius de l’IEO sus son territòri d’accion dins l’agach de sas especificitats istoricas, geograficas e umanas sieunas.

De mai, divèrses sectors, associacion afiliadas o membres de l’IEO se mainan d’activitats especificas.

L’IEO es membre del Malhum Europèu de Promocion de la Diversitat Lingüistica (NPLD), del Comitat Francés de las Lengas las mens Espandidas (EBLUL-France) e dels Rencontres Interregionals, que recampan reprensentants de las diferentas lengas de França. L’IEO es tanben un club UNESCO.

Las grandas orientacions de l’IEO

Viure l’occitan cada jorn
L’IEO participa a la socializacion de la lenga e a la reconéissença de la cultura occitana per sas accions (Veire tanben la rubrica d’informacion sus la lenga occitana) :

• L’occitan qu’es aquò ?. Es un document de comunicacion a destinacion del grand public (ofrmat tabloïd editat en 2007, 2009 e2010 a paréisser) sus la lenga e la cultura occitana.
• Lo labèl Òc per l’occitan lançat per l’Ofici per l’Occitan qu’a per tòca de valorizar los organismes qu’emplegan la lenga dins lo cadre de lor activitat professionala e aital tòrnan rendre presenta la lenga dins l’economia. Una labellizacion Òc per l’occitan per las collectivitats localas qu’incita a l’utilizacion de l’occitan dins la vida publica es lançat dempuèi la debuta de 2010.
• Las Paginas occitanas Las Paginas Occitanas es un annuari internet que recensa los actors d’Occitània, que siá al nivèl economic coma al nivèl cultural.
• Lo Servici de l’emplec. es lo primièr servici que bòta en relacion emplegaires e demandaires d’emplecs a l’entorn de lor competéncia en occitan, mas pas solament. Vos esperam sus emplec.com.
• L’IEO es a l’inicativa de la creacion de la coordinacion Anem Oc, bastit en 2004 e a l’origin de grandas manifestacions per defendre la cultura occitana en 2005, 2007 e 2009. Anem òc revendica la mesa en plaça de politicas lingüisticas per desvelopar l’emplec de la lenga occitana dins los medias, la creacion artistica, l’ensenhament et la vida publica.

Centre de ressorgas e de recercas

• Servici del patrimòni toponimic : Informacion, recercas toponimicas e ajuda a la mesa en plaça de senhaletica bilingüa ;
• Traduccion e conselhs lingüistics : Traduire, conselhar e tornar repassar, e balhar propausicions terminologicas. L’IEO publiquèt lexics terminologics en biologia, matematicas, e telefonia mobila.
• L’Ieo e lo Conselh Genrau d’Aran son a l’iniciativa de l’Acadèmia de la Lenga Occitana qu’a per tòca de refortir l’unitat de la lenga occitana dins lo respècte de sa diversitat.

Los corses d’occitan per adultes.

• L’IEO nacional associat a l’Escòla Occitana d’Estiu (EOE) e al Centre de Formacion Professionala Occitana (CFPO) realizan una campanha de promocion dels corses d’occitan per adultes sus tot l’airal occitan mas tanben sus internet e per correspondéncia. (afichas, plaquetas sit web : www.aprenemloccitan.com).
• Per desvelopar la qualitat de l’ofèrta de formacion en occitan per adultes, l’IEO, l’EOE e lo CFPO se son associats per crear lo label PARLESC, lo malhum labellizat de corses d’occitan per adultes.

Lo sector libres

• IEO-IDECO es lo sector edicion e difusion de l’Institut d’Estudis Occitans. Situat a Puèglaurens (81), assegura d’una part l’edicion de libres en occitan e d’autra part la difusion de la màger part de la produccion culturala occitana. IEO-IDECO es sostengut per lo Centre National du Livre (CNL). Mantunas seccions departamentalas e regionalas desvelopan tanben una activitat d’edicion (libres, revista, CD), sovent en sòci amb l’IDECO.
• La revista Anem Occitans ! nacional publica una revista trimensadièra, Anem Occitans ! recebuda per cada aderent de l’associacion. Son estampatge a 1700 exemplars fa d’ela una de las revistas occitanas las mai importantas.